|
 Azken Portuko jai batzordeak, abuztuko jaietan ez ezik urtean zehar ere auzoari bizitza emateko ekimenen baitan, politika eta kazetaritzari buruzko jardunaldiak antolatu ditu aurten, lehen aldiz. Azken urteotan maiatzean antolatutako literatura asteak segida izango du aurten ere, baina lehenago beste ekimen interesgarri bat ere antolatu du jai batzordeak: ‘Politika, kazetaritzaren bideetatik’ jardunaldiak. Euskal politikan gaur-gaurkoak diren hiru gai hautatu, eta Zarauzko hiru kazetarirekin horiei buruz solasean aritzeko aukera izango da. Gorka Landaburuk EAEko gobernu aldaketa izango du hizpide, PSE-EEk agintea eskuratu eta urtebete igaro denean. Patxi Elola Zarauzko PSE-EEko zinegotzia izango du aurkezle eta gidari. Imanol Murua Uriak, berriz, aste honetan bertan aurkeztu duen ‘Loiolako hegiak’ liburuaren nondik norakoak aletuko ditu, azken negozioazio prozesuaren inguruko argibide eta xehetasun guztiak azalduz. Azkenik, Iñaki Sotok, ezker abertzalearen hausnarketa prozesuaz eta horren ondorio gisara plazaratutako ‘Zutik Euskal Herria’ ebazpenaz hitz egingo du. Honakoa da egitarau zehatza: Martxoak 15, astelehena: Hizlaria: Gorka Landaburu [kazetaria. Aldaketa 16 aldizkariko zuzendaria]. Gaia: Aldaketa Euskal Autonomia Erkidegoan. PSE-EE urtebete gobernuan, nazionalismoaren alternatiba. Aurkezlea eta gidaria: Patxi Elola Martxoak 16, asteartea: Hizlaria: Imanol Murua Uria [idazlea eta kazetaria]. Gaia: ‘Loiolako hegiak’ liburuaren aurkezpena. Azken su-etenaren eta negoziazio prozesuaren oinarriak: PSE-EE, Batasuna eta EAJren artekoak, zein ETAren eta Espainiako Gobernuaren artekoak. Aurkezlea eta gidaria: Gari Berasaluze Martxoak 17, asteazkena: Hizlaria: Iñaki Soto [Gara egunkariko kazetaria] Gaia: Ezker abertzalearen barne eztabaida, ondorioak eta ‘Zutik Euskal Herria’ ebazpena. Aurkezlea eta gidaria: Jon Benito LEKUA: Azken Portuko kristau biltoki zaharra. ORDUA: 20:00etan. ANTOLATZAILEA: Azken Portuko jai batzordea. BABESLEA: Urola Kostako Hitza Laguntzaileak: Zarauzko Udala eta Berria egunkaria Jardunaldien inguruko informazio zehatza, audioak eta gainerakoak, hurrengo egunotan: www.azkenportu.net
|
